Lahore: Tehreek Insaaf ke Chairman Imran Khan ki ahliya Bushra Bibi ke sabiq Shaohar Khawar Fareed Maneka ney doosri shadi karli. Pakistani zaraye ablaagh ke mutabiq PTI Chairman Imran Khan ki teesri ahliya aur bahot jald Pakistan ki khatoon e awwal ka aizaz haasil karne wali Bushra Bibi ke sabiq Shaohar Khawar Maneka ney Samira Agha naami 40 sala khatoon se doosri shadi karli. Khawar Maneka ke qareebi saathi Lateef Khan ney un ki doosri shadi ki tasdeeq karte hue kaha ke Khawar Maneka ki shadi Lahore mein anjaam payi jis mein un ke doston, qareebi rishta daaron aur un ke bachon ney shirkat ki. Khawar Maneka Bushra Bibi ke sabiq shohar hain un dono ki Talaq ke baad Imran Khan ney 6 mah qabal Bushra Bibi se shadi ki thi. Wazeh rahay ke Bushra Bibi Imran Khan ki teesri biwi hain, is se qabal Imran Khan ney Jemima Gold Smith se paheli shadi ki thi jis se un ke do baite Qasim aur Suleman hain jab ke doosri shadi Reham Khan se ki thi taham yeh shadi sirf 10 mah hi chal saki baadazaan dono ke dramyan alehadgi hogayi.