Hyderabad: Icecream, cool drinks , chips, fried chicken aur bakery mein tayyar honay wali ashiya khaiye aur heart attack se marjaye, jee haan! hum koi mazaq nahi kar rahay hain balkay haliya tahaqeeq mein inkishaaf kiya gaya hai ke mazkoorah Ghizaien insaan mein heart attack ki bunyadi wajohaat mein shaamil hain kyun kay ek zamana tha jab heart attack aur dil ke deegar amraaz darmiyani Umar ya budhapay mein samnay atay they lekin ab yeh noujawanon mein bhi aam hotay jarahay hain .
Dil insani jism ke ahem tareen aaza may se ek hai lekin haeran kan tor par hum iski ziyada parwa nahi karte. roz marrah ke tanao aur muzir sahet ghiza ke istemaal se is par boojh badhate rehtay hain halaanke sab ko ilm hai ke bohat ziyada chiknai se bharpoor ghiza blood cholesterol ki satah badhaane ka baais banti hai jis ke nateejay mein khoon ki shareyanien sukarnay lagti hain aur dil apne afaal sar-e-anjaam dainay se qassar honay lagta hai. iska nateeja heart attack ya amraaz-e-qalb ki shakal mein nikalta hai .
Aalmi idaara sahet ( WHO ) ke mutabiq pakwaan ke tail aur ghee mein shaamil ki janay wali mukhtalif sabzion, nabataat aur janwaroun se haasil ki gayi transfat yani chiknai aur charbi insani sahet ke liye muzir hai, jis se amraaz-e-qalb sameit kayi bemariyan paeda hoti hain .
WHO ki ek report ke mutabiq ghee aur pakwan ke tail mein jadeed tareeqay aur factories ke andar shaamil ki janay wali chiknai aur charbi se insaan mukhtalif bimariyoun mein mubtala hokar mout ke mu mein jarahay hain .
khaano mein istemaal honay walay pakwaan ka tail aur ghee mein payi janay wali charbi aur chiknai se duniya bhar mein salana 5 laakh halakatain hoti hain. lekin kiya aap jantay hain ke kon kon si Ghizaien dil ke liye tabah kan saabit hoti hain? agar nahi to jaanlen .
Gosht ke qatlay mein aisi charbi bohat ziyada miqdaar mein hoti hai jo ke nuqsandeh cholesterol ki satah mein izafah karti hai jis se heart attack ya faalij ka khatrah badhta hai, un qatloun mein namak ki miqdaar bhi kaafi ziyada hoti hai jis se blood pressure badhta hai aur dil ko ziyada mehnat karni padtee hai, namak ki ziyada miqdaar faalij, amraaz qalb aur dil ke band honay ka baais ban sakti hai .
Aisa nahi ke gaaye ya bakray ka gosht na khayen, magar iska bohat ziyada istemaal amraaz-e-qalb aur diabities ka khatrah badhata hai, jis ki wajah is mein charbi ki miqdaar ziyada hona hai jo cholesterol ki satah badhata hai, to surkh gosht se lutaf andoz hon lekin bohat ziyada khanay se gareiz karen jabkay charbi se pak gosht ko ziyada tarjeeh den .
Soft drinks bhi is fehrist mein shaamil hai, un meethay mashrobat ko kabhi kabhar peena to ziyada nuqsaan nahi pohanchata lekin unka rozana istemaal zaroor khatarnaak saabit ho sakta hai, jis ki wajah un mein mithaas ki miqdaar bohat ziyada hona hai, un mashrobat ko ziyada peenay se jismani wazan mein izafah hota hai jis se Diabities type 2, high blood pressure aur amraaz-e-qalb ka khatrah badhta hai jo agay badh kar heart attack aur faalij ka baais bhi ban sakte hain .
Biscuits, Cake aur deegar bakery ashya yaqeenan mazedar hotay hain lekin un mein cheeni ki miqdaar bohat ziyada hoti hai aur inhen ziyada khana motapay ka baais bantaa hai, un mein try Glacder ki satah bhi bohat ziyada hoti hai jo ke amraaz-e-qalb ka baais banti hai, un masnoaat ki tayari ke liye maiday ka istemaal hota hai jo blood sugar badha sakta hai aur bhook badhata hai .
Chawal, Double Rotti aur Pasta jo maiday se banay hon, un mein sahet bakhash fibre, vitamins aur minerals ki kami hoti hai, refine ijnaas jism mein jaakar bohat taizi se shakar mein badal jati hain jo jism charbi ke tor par zakheera karta hai. is tarha ki refine ijnaas ka ziyada istemaal tond ka baais bantaa hai jo ke amraaz-e-qalb aur diabities type 2 ka khatrah badhata hai .
Pizza sahet ke liye faida mand bhi ho sakta hai ke agar usay durust tareeqay se pakaya jaye magar bazaar mein dastyab aksar pizza namak, charbi aur calories se bharpoor hotay hain aur yeh sab heart attack ka khatrah badhaane walay anasir hain .
Tail mein ban’nay walay French fries bhi dil ke liye nuqsaan da hain yeh chips mazedar to hotay hain lekin un mein charbi aur namak ki miqdaar bohat ziyada hoti hai jo dil ke liye nuqsaan da hain. Ek tahaqeeq mein daryaft kiya gaya ke jo log French fries ziyada khanay ke aadi hotay hain un mein heart attack ya amraaz-e-qalb se jald mout ka khatrah badhta hai .
French fries ki terha fried chicken ko bhi deep fry kiya jata hai jis se un mein calories, charbi aur namak ki miqdaar badh jati hai, jin ke nuqsanaat oopar darj ho chukay hain, mukhtalif tibbi tehqeeqi reports mein tali hui ghizaoun se diabities type 2 , motapay aur high blood pressure ke khatraat bhadne ki nishandahi ki gayi hai jo sab heart failure ka baais ban satke hain .
Icecream mein cheeni, calories aur saturated fats ki miqdaar kaafi ziyada hoti hai to usay kabhi kabha khana hi behtar hota hai, charbi aur cheeni se bharpoor ghizaoun ka ziyada istemaal motapay ke sath jism mein try glaceders ki satah badhata hai jis se heart attack ka imkaan badhta hai .
Bakery ya companiyon ke tayyar kardah chips motapay ka baais ban satke hain jis ki wajah un mein charbi ki miqdaar ziyada hona hai jabkay un mein namak ki miqdaar bhi bohat ziyada hai jo amraaz-e-qalb ka khatrah badhati hai .
Mazkoorah Ghizaien aaj duniya bhar ke awam ki maqbool tareen Ghizaien hain aur un ke asraat hyderabadi tahazeeb par bhi deekhaee day rahay hain lehaza ab hamein apni rozaanh istemaal honay wali ghizaoun ko daykhna hoga ke kahin un mein yeh Ghizaien to nahi jo hamari zabaan ko lazeez aur Aziz hain lekin dil ke liye nuqsaan da hain . –YTN STAFF