Hyderabad : Hyderabad ki ek hotel mein 1 shakhs 100 dinoun se ziyada arsa tak raha aur mubaiyana tor par 12.34 laakh rupay ka bill ada kiye baghair faraar hogaya. police neh bataya ke Taj Banjara hotel intezamia ki janib se darj shikayat par karwai karte hue police ne A Shankar Narayan Nami shaks ki khilaaf dhoka dahi aur mujremana ghaddari ka muqadma darj kiya gaya hai, mazkoorah shakhs Visakhapatnam ka rehne wala tha.
Hotel intezamia ke mutabiq, woh shakhs 102 din tak hotel ke Luxury suit mein raha, iska bill 25.96 laakh rupay bangaya. is neh 13.62 laakh rupay ada kiye aur rawan saal April mein bina kisi ko bataye hotel chodh kar chala gaya. iske baad, hotel intizamia neh is shakhs ko phone kiya, is ne wada kiya ke woh poori raqam ada karega. taham, baad mein is ne apna phone band kar diya. iske baad, hotel intizamia ne Banjara hills police station mein FIR darj karwaya.
Deputy inspector of police P Ravi ke mutabiq, Hotel intizamia ki shikayat par, tehqiqaat shuru kar diya hai. Businessman Narayan ne yeh daawa kiya hai ke woh hotel mein poori raqam ada karke aaya tha. meri Shabih ko daghdar karne ki koshish ki jarahi hai. unhon neh kaha ke woh hotel ke khilaaf qanooni karwai karne par ghour kar rahay hain. –YTN STAFF