Hyderabad: Nawabon ka shehar Hyderabad apni maizbani aur geezaoun ki wajah se kaafi shohrat rakhta hai jabkay Shehar Hyderabad ki Biryani to aalmi shohrat Yafta dish hai. Isi terha Hyderabad mein nashtay mein khaayi janay wali sab se mashhoor dish Nehari Paaya hai lekin guzashta aik dahe ke douran yeh nashta Nehari Paaya zawaal Pazeer ho chuka hai aur is ki jagah janoobi Hindustan ke Dosa ney taqreeban le li hai.
Shehar Hyderabad ke nashtay mein Nahari Paaya ko woh maqboliat haasil thi jo ke kisi Mulk ke badshah ko haasil rehti hai. Hyderabad mein Nehari Paaya sirf nashtay mein hi nahi balkay dopehar aur shaam ke auqaat bhi awam ki awleen pasand hoti thi yahi wajah thi ke puranay shehar ke taqreeban har muhallay aur gali mein jahan mashhoor Hotel mojood ho wahan ba aasani Nehari Paaya mil jata tha lekin aaj yeh zawaal Pazeer honay ki wajah se shehar Hyderabad ke chand makhsoos ilaaqon mein hi chand makhsoos hotelon mein hi dastiyabhai.
Tolichowki se talluq rakhnay walay Hotel ke Maalik Mohammad Irfan ney Hyderabad mein Nehari Paaya ke zawaal Pazeer honay ki wajohaat batatay huwe kaha ke janoobi Hindustan ke Idli aur Doosa ki maqboliyat ney Nehari Paaya ko shikast di hai. Yahi wajah hai ke ab Hyderabad mein makhsoos ilaaqon ki Hotelon mein hi yeh Nehari Paaya nashtay mein mil raha hai, Halaan ke aaj se chand baras qabal Yakutpura, Shahalibanda, Misriganj, Talabkatta, Jahannuma, Karwan aur Asif Nagar ke aksar ilaaqon aur Hotelon mein Nehari Paaya nashtay mein ba aasani mil jaya karta tha aur Hotelon ke bahar baday daal dekche mein Nehari dheemi aanch par musalsal mojood hoti thi.
Hotelon mein nashtay ke douran Nehari Paaya khanay walay afraad ki aik badi tadaad mojood thi is ke ilawa nashtay mein Nehari paaya ke parcel bhi senkron ki tadaad mein ghar le jatay they. Yahi wajah hai ke aik daal hai pehlay taq bhi taqreeban har subah hotelon se nashtay ke liye Nehari Paaya ke senkron parcel farokht hotay they lekin ab batadreej is ki maang mein nah sirf giravat aayi hai balkay is ke bajaye janoobi Hindustan ke khanay Idli Doosa pehli pasand ban chuke hain. Nehari Paaya ke bajaye Idli Doosa ki maqboliyat ka aik ahem wajah yeh bhi hai ke sahet ke liye Doctoron ki janib se nashtay mein Idli khanay ki jo tajweez di ja rahi hai is ney bhi hyderabad mein nashtay ki rivayet ko badal diya hai. Nehari ki tayari mein chunkay gosht ke ilawa ghee aur deegar masalha jaat istemaal kiye jatay hain jis se is ka hazem hona wazni mashq ban jati hai. Is ke bar aks Idli ko sahet ke liye halki phulki ghiza tasawwur kiya jata hai.
Bahadurpura ki aik Hotel mein Nehari tayyar karne walay master bawarchi Jaani Miya neh Nehari Paaya ke Hyderabad se nashtay mein khatam honay ki wajohaat ka tazkara karte huwe kaha ke Hyderabadi awam ka mizaaj badal chuka hai aik woh zamana tha jab aadhi raat se hi Nehari ki tayari shuru ki jati thi subha subha nashtay ke liye tayyar ho jaya karti thi lekin ab Hyderabadi awam ka mizaaj badal chuka hai lehaza unhon neh bhi paanch saal qabal hi Nehari tayyar karne ka kaam band kardiya hai aur ab is ki bajaye woh Juice Center chala rahay hain.
Shehar Hyderabad se nashtay mein Nehari Paaya ke khatam honay ki aik wajah Hyderabadi awam mein sahet mand ghizaoon ke istemaal ke liye shaoor beedar bhi hai. Is ziman mein izhaar khayaal karte huwe Imran Hotel ke Mohammad Yousuf neh kaha ke Nehari Paaya 20 saal qabal Hyderabad ka mashhoor nashta tha lekin ab awam masalha jaat, tail aur ghee ke istemaal mein kaafi ahtiyat baratnay lagey hain kyunkay Social Media par kayi aisay videos mojood hain jis mein khanay ki tayari mein sasta aur ghair mayaari tail istemaal kiye janay ki tafseelaat faraham ki jarahi hain.
Nizamiya tibbi government hospital ke sabiq superintendent Dr Rafi Ahmed daal neh kaha hai ke shehar Hyderabad ke beshtar ilaaqon ke awam gurdon ke aarzay mein mubtala ho rahay hain jo ke ghizai aadaat ki wajah se hai lehaza ab puranay shehar ke awam ghiza ke istemaal mein kaafi mohtaat ho chuke hain. tail aur chiknaee se bharpoor ghizaoon ka istemaal ab tark kiya ja raha hai. Yahi woh wajohaat hain jin se ab Hyderabad mein Nehari Paaya ka istemaal qissa Parinah ban chuka hai aur is ki jagah Idli Doosa neh le liya hai.