Dubai: Chennai Super Kings ke Captain Mahindra Singh Dhoni jummay ko Sunrisers Hyderabad ke khilaaf IPL mein wapsi ke azm ke sath maidan mein utrain ge jabkay David Warner ki zair qayadat Hyderabad ki team jeet ka silsila barqarar rakhnay ke liye koshan hon gi. Chennai Super Kings ko pichlle 2 matchon mein musalsal shikast ka saamna karna pada tha aur team ek hafta ke waqfay ke baad apna choutha match khailay gi. Chennai pichla match Delhi Capitals ke khilaaf harr gayi thi jabkay Hyderabad ne apne pichlle match mein Delhi ko 15 runs se shikast di thi. Is terhan Hyderabad ne Tournament mein apni pehli jeet ka zayega chakkha tha.
Chennai 3 matchon mein 2 shikast aur 1 match mein jeet se 2 points ke sath points table mein sab se neechay aathween number par hai jabkay Hhyderabad bhi ek jeet aur 2 shikaston ke sath 2 points ke sath satwen number par hai. Chennai ne difai champion Mumbai Indians ko shikast day kar apni muhim ko fatihana andaaz mein shuru kiya tha lekin is ke baad woh aglay 2 match ganwaa baithi hai.
Hyderabad ki shuruvaat ek shikast ke sath hui thi aur pehlay match mein usay Royal Challengers Bangalore ke khilaaf shikast ka saamna karna pada tha. Dosray match mein usay Kolkata Knight Riders ne shikast di. Taham teesray match mein Hyderabad ne Delhi ko shikast day kar pehli fatah ka zayega chakkha jis ne lagataar 2 match jeetay thay.
Chennai aur Hyderabad dono teamon mein behtareen khiladi mojood hain jo kisi bhi team ko shikast dainay ki salahiyat rakhtay hain lekin Chennai ke samnay opening jodi ka naaqis faam tashweesh ka baais hai. Pichlle matchon mein Murli Vijay aur Shane Watson dono hi team ko ek badi shuruvaat dainay mein nakaam rahay. Murli Vijay ki form itni kharab hai ke woh is format mein mukammal tor par nakaam saabit ho rahay hain. Is mein herat ki koi baat nahi hogi agar Vijay ko is match mein shaamil nah kiya jaye.
Suresh Raina ke IPL se baher honay ka assar ab team par wazeh tor par dekha ja sakta hai. Team middle order mein Raina ki kami mehsoos kar rahi hai. Agarchay Faf du Please mustaqil tor par umdah karkardagi ka muzahira kar rahay hain lekin koi bhi khiladi is ki himayat karne ke liye craze par ziyada waqt nahi guzar raha hai. Chennai ko umeed hai ke Ambati Rayudu fit hotay hue is match mein wapas ajayeen ge aur captain Dhoni par dabao bhi khatam hojaye ga ke woh batting order ku agay badhayain.
Faf du Plessis ne Rajasthan Royals aur Delhi ke khilaaf ek siray se inning sambhali lekin dono matchon mein badi shiraakat nah honay ki wajah se Chennai ko is ka faida nahi huwa. Chennai ke middle order batsman Raturaj Gaikwad, Kedar Jadhav aur Dhoni ab tak mutasir karne mein nakaam rahay hain. Rayudu ki wapsi Dhoni ke bohat saaray khadshaat ko daur kar sakti hai aur Gaikwad ko baher hona pad sakta hai.
Hyderabad ke Openers ne Delhi ke khilaaf badi shiraakat ke sath mazboot aghaaz kiya aur Chennai ke samnay usay is taal ko barqarar rakhna hoga. Taham aakhri match mein Manish Pandey sastay mein out hue thay aur inhen jald hi apni form haasil karni hogi. Team ne Kane Williamson ko aakhri match mein team mein shaamil kiya tha aur is mauqa se faida uthaya aur 41 runs ki Inning kheli. Hyderabad ki nigah ek baar phir Williamson par hogi. Team ke star spinner Rashid Khan ne Delhi ke khilaaf shandaar bowling ki aur 4 overs mein 14 runs day kar 3 wickten haasil kee. Chennai ke Batsman ko Rashid ki span se bachna hoga jo un ke liye ek mushkil challenge pesh kar saktay hain. Chennai ke Captain Dhoni aur Hyderabad ke Captain David Warner ke darmiyan yakeeni tor par dilchasp muqaabla hoga aur dono temen doosri jeet darj karne ke iraday se Tournament mein daakhil hon gi.