Hyderabad : Peer ke roz LB nagar ke ek niji hospital mein lagi aag mein 4 mah ka bacha halaak ho gaya aur 5 afraad zakhmi hogaye. din ke ibtidayi auqaat mein Shine Childrens Hospital ki chowthi manzil par ICU mein aag bhadak uthi, jiske nateejay mein NICU mein moujood 6 bache jalne se zakhmi hogaye, un mein se ek bachay ki mout waqay hogayi, jabkay deegar bachon ko ilaaj ke liye qareebi hospital muntaqil kardiya gaya. is haadsa ke baad hospital ke deegar floors par zair-e-ilaaj 40 bachon ko shehar ke mukhtalif hospitals mein muntaqil kar diya gaya hai.
Police ko short circuit ki wajah se aag lagnay ka shoba hai. reyasti Telangana hukoomat ne is waqea ka sanjeedgi se note letay hue tehqiqaat ka hukum diya hai. Wazeer-e-sahet Etelea rajendar ne ohdedaron ko is waqeye ki tehqiqaat karne aur 24 ghantoun mein report pesh karne ki Hidayat ki hai.
Bachon ke walidain ne ilzaam lagaya ke hospital intizamia ki Adam tawajhi ke baais aag lagi. unhoun ne hospital intizamia ke khilaaf sakht karwai ka mutalba kiya. muqami rukan qanoon saaz sudhir reddy ne hospital ka dora kiya aur is waqeye ki tehqiqaat ka mutalba kiya. sath hi BJP ke rehnuma Ramchandra Rao aur deegar ne bhi jaye waqoo ka doura kiya. –YTN STAFF