Chandigarh: Aaj kal jo gaane bazaar mein aarahay hain un mein akhlaq ke girtay miyaar par sab ko tashweesh horahee hai kyunkay un ganoun se behayai aur beraah rawi ki raah hamwar horahee hai jabkay Rap Singers bhi aisay be-Huda alfaaz ka istemaal kar rahay hain jo kay ek taleem Yafta aur mohazib samaaj mein kabhi bhi qabil-e-qubool nahi ho saktay yeh hi wajah hai ke aaye din pop singers ke khilaaf muqadmaat darj hotay hain aur ab naye muamlay mein honey singh ke khilaaf ek aur muqadma darj kiya gaya hai.
Gulukar wo mousiqaar Yoyo Honey Singh ke khilaaf gaane mein khawateen ke liye intahi na munasib lafz istemaal karne par Punjab mein muqadma darj kardiya gaya. yeh pehla mauqa nahi hai ke Honey Singh par gaane mein na munasib aur behooda alfaaz istemaal karne par muqadma darj kya gaya ho, is se qabal 2013 mein bhi inhen qanooni karwai ka saamna karna pada tha.
Honey Singh ko 2013 mein mein hun Balatkari gana gaane par qanooni karwai ka saamna karna pada tha aur ab inhen gaane Makhna mein khawateen se mutaliq behooda lafz istemaal karne par karwai ka saamna karna padh raha hai. Honey Singh ke guzashta baras release honay walay gaane par Punjab ki khawateen se mutaliq kaam karne commission ne aitraaz karte hue police ko unke khilaaf karwai karne ki darkhwast ki hai.
Khawateen se mutaliq kaam karne walay commission ke mutabiq Honey Singh ke decemeber 2018 mein T- series ke banner taley release kiye jaane walay gaane makhna mein khawateen se mutaliq intahi behooda alfaaz stamal kiye jo na qabil-e-qubool aur khawateen ki ahmiyat ko kam karne ke mutradif hai. khawateen commission ne honey singh ke gaane mein shaamil mein hon womens*** jumlay par aitraaz karte hue police ko unke khilaaf karwai karne ki darkhwast di. Womens***ki maienay ek aisay shakhs ke tor par li jati hain jis ke back waqt mutadid khawateen se taluqaat hotay hain aur ab gulukar ke khilaaf muqadma dair kardiya gaya.
Tafseelaat ke mutabiq riyasat Punjab ke zila Saas nagar ke Matar police thaanay mein Honey Singh ke khilaaf tazirat hind ki dafaa 294 aur 502 aur IT act 2000 ki dafaa 67 ke tehat muqadma dair kardiya gaya. Honey Singh ke khilaaf dair kiye gaye muqadmay mein khawateen ko na munasib andaaz mein paish kiye jaane se mutaliq 1968 ke act ki dafaa 6 ko bhi shaamil kiya gaya hai. report ke mutabiq gulukar ke khilaaf Lokhedar kumar Nami shakhs ki darkhwast par muqadma dair kiya gaya. khayaal rahay ke honey singh ka yeh gana DEC 2018 mein release kiya gaya tha aur usay youtube par ab tak 20 crore se zayed baar dekha ja chuka hai. gaane mein Honey Singh ke sath Neha kakkrah aur singhsta ne aawaz ka jaadoo jagaya hai.
Honey Singh par ganoun mein aryanit aur manshiat ke aam istemaal ko fashion ke tor par dikhaay jaane par tanqeed ka nishana banaya jata hai. Honey Singh ka pehla mashhoor bangra gana lick 28 kari da 2011 mein release hua tha, lekin woh is gaane se qabal hi mutadid award haasil kar chuke they. Honey Singh ne Bollywood filmon Cockatil , Chennai express, Boss, Gabar is back aur Mastan sameit deegar filmon ke liye bhi gaane gaaye. Honey Singh ne mutadid punjabi wo deegar filmon mein adakari ke johar bhi dikhaay, taham inhen shohrat rapper aur bangra gulukar ke tor par hi mili. Honey Singh 2015 se 2017 ke darmiyan music ki duniya se gayab bhi rahay they woh depression sameit deegar zehni masail ka shikaar hogaye they aur phir decemeber 2017 mein unhoun nr music ki duniya mein wapsi ki.- YTN STAFF