London: Baaparda Muslim khawateen apni salahiyatoun ke mutabiq mukhtalif shoba haae zindagi mein kamyabi ke jhande gadh sakti hain aur hijab muashray mein un ki taraqqi ki raah mein haail nahi hota. Un khayalat ka izhaar Bartania mein pehli sarposh odhney wali muslim khatoon judge Raffia Arshad ne kiya hai. 40 sala Raffia ko guzashta haftay Bartania ke ilaqay Midlands circuit mein deputy district judge muqarrar kiya gaya hai. Is terhan un ke ek darina khawab ne tabeer payi hai. Unhoun ne kaha ke mein ne 11 saal ki omar hi mein qanoon ka pesha ikhtiyar karne ke khawab dekhnay shuru kardiye they lekin sawal ye tha ke kya ek nasli aqliat se talluq rakhnay aur hijab odhaney ke bawajood wo Bartania mein judge ke mansab par faiz hosakti hain?
Bartania ke Judicial daftar ke yakam April 2019 ko faraham kardah adaad-o-shumar ke mutabiq England aur Wales ki matehat adalatoun mein 3210 judge kaam kar rahay hain. Un mein sirf 205 ( 6 feesad ) judge siyah faam, Asiayi aur nasli aqlitoun ( beam ) ke group se talluq rakhtay hain. Un tamam judge mein taqareeban ek tahai 1013 ( 31 feesad ) khawateen hain.
Raffia Arshad ab un khawateen Judges mein se ek hain. Wo shadi shuda hain aur un ke 3 bachay hain. Unhoun ne apne taqarrur ke baad ek interview mein kaha wo is baat ko yakeeni banana chahti hain ke Bartania muashrat mein tanawu ki aawaz buland aahang ho aur saaf andaaz mein suni jaye. Ye sirf muslim khawateen hi nahi balkay tamam khawateen ke liye ahem hai.
Unhoun ne kaha ke unhein bah tor judge taqarrur ke baad mard-o-khawatin dono ki taraf se Email ke zariye badi tadaad mein tehniyati paighamaat masool huve hain aur unhoun ne bilkhushoos is baat par khoshi ka izhaar kiya hai ke ek hijab wali khawatoon bhi Bartania mein judge ban gayi hai. Un mein se bohat se logoun ka pehlay ye khayaal tha ke ek aurat to Bartania mein Barrister bhi nahi ban sakti.
Raffia Arshad Yorkshire mein pali badhi theen. Qanoon ka pesha ikhtiyar karte waqt unhein bohat si mushkilaat ka saamna karna pada tha aur khud un ke khandan ke afraad ne un ke hijab odhaney ki mukhalfat ki thi aur ye kaha tha ke is soorat mein un ki kamyabi ke imkanaat madoom ho saktay hain lekin is ke bawajood unhoun ney himmat haari nahi aur nah un ke azm mein kami waqay huvi.
Unhoun ney mazeed kaha ke jab mein 2001 hamza mein Inns of Court School of law mein ek Scholarship ke liye interview dainay ja rahi thi to hamaray khandan ke ek rukan ney ye mashwara diya ke mein hijab nah pehnoon kyunkay agar mein ney aisa kiya to mere kamyabi imkanaat dramayi tor par kam hojaienge. Hatta ke is rishte daar ney mujhe khabardaar bhi kiya lekin mein ney un ke dabao ke agay jhuknay se inkaar kardiya.
Unhoun ney apni baat jari rakhtay huve kaha kay mein is idaray mein hijab pehan kar interview ke liye gayi, Mein kamyaab rahi aur mujhe wazifay ke liye muntakhib kar liya gaya tha. Meri zindagi mein ye ek faisla kun moud tha aur is se mere azm ko mazeed taqwiyat mili thi.
London mein qanoon ki tarbiyat ke baad Raffia ne 2002 hamza mein Nottingham mein trainee wakeel ki hesiyat se kaam ka aaghaz kiya tha. Phir unhoun ne 2004 hamza St Mary’s Family Law Chambers mein bah tor Barrister kaam kiya. Wo guzashta 15 saal ke douran mein bachoun, Jabri shadi, khawateen ke khatny aur Islami shariat se mutaliq muqadmaat ke bah tor wakeel pairwi karti rahi hain. Wo Islam ke aayli qawaneen ke mauzo par ek kitaab ki Musanifa bhi hain.
Unhoun ne kaha ke inhen qanoon ki Practice ke douran mein aksar mutassbana rowaye ka saamna raha hai aur baaz auqaat dilchasp waqeat bhi pesh aaye hain. Ek martaba mein adalat mein gayi to mujhe ek urdali ne poocha ke kya mein koi mokilla ya darkhwast guzaar hon. Is par mein ne jawab diya ke nahi. Wo phir kaha ke aap phir zaroor mutrajim hongi. Mein ne is ka naan mein jawab diya to phir wo bola shayad aap yahan kaam ke tajarbay ke silsilay mein aayi hongi. Is ka bhi mein ne nahi mein jawab diya aur is ko bataya ke mein darasal ek Barrister hon.
Is waqeye se bakhoobi andaza kiya ja sakta hai ke Bartania aisay muashray mein bhi ek khatoon ko wakeel ke tor par qubool karne mein hichkichahat ka muzahira kiya jata hai lekin unhoun ney wazeh kiya ke mera taqarrur khalstan Merit par huwa hai aur is bana par nahi huwa ke mein hijab pehanti hon. Is mein muslim khawateen ke liye sabaq panhan hai ke wo bhi hijab pehan kar zindagi ke mahdanoun mein kamyabi ke jhande gadh sakti hain. –YTN STAFF