Abu Dhabi: Mumbai Indians ke Star All Rounder Hardik Pandya aur Royal Challengers Bangalore ke All Rounder Chris Morris ko IPL ke zabita-e-ikhlaq ki khilaaf warzi ka murtakib paaya gaya hai jis ke liye Match Referee ke zareya dono khiladion ki sarznish ki gayi hai.
Abu Dhabi ke Sheikh Zayed Stadium mein Mumbai Indians aur Royal Challengers Bangalore ke mabain khailay gaye Match ke douran mein dono khiladi maidan mein ek dosray se takraar karte nazar aaye thay.
Dono khiladion ke mabain is waqt takraar hui jab Mumbai Indians hadaf ka taqub kar rahi thi. Chris Morris Mumbai ki Inning ke 19 wi over mein Bangalore ki taraf se bowling kar rahay thay aur Hardik Pandya Craze par mojood thay is over ki chothi gaind par Hardik ne ek chakka lagaya lekin agli hi gaind par Morris ne Mohammad Siraj ke hathon catch out kara diya.
Jab Hardik pavellion lout rahay thay to Morris ne kuch tabsarah kiya aur dono ne behas shuru hogayi. dono ne ek dosray se kuch isharay bhi kiye. Match Referee Manu Nayyar ne un dono ke is harkat ko sanjeedgi se liya aur un dono ko IPL ke zabita-e-ikhlaq ki khilaaf warzi ka murtakib paaya.
Hardik ko defaa 2.5 ki khilaaf warzi karne par IPL ke zabita-e-ikhlaq aur Morris ki dafaa 2.20 ki khilaaf warzi karne ka murtakib qarar diya gaya tha. Match referee Manu Nayyar ne dono khiladion ki sakht sarznish ke sath agay bhadne ka intibah diya hai.