Hyderabad: Telangana ke Wazeer-e-Sahet Eatala Rajendar ne kaha hai ke Corona waba ne saari insaaniyat ko pareshan kar rakha hai aur neendain haraam kar di hain. Unhoun ne Wazeer-e-Panchayat Raj Dayakar Rao ke sath mutahidda zila Warangal mein corona waba, Is ki rokk thaam par iqdamaat par ohdedaron ke sath jaiza ijlaas munaqqid kiya. Is mauqa par wazeer Mosoof ne kaha ke hamein Covid-19 ko challenge ke tor par qubool karna hoga.
Unhoun ne Doctors se kaha kay wo mareezon ki mazeed behtar se behtar khidmat karen. Coronavirus ki alamaat ka bar-o-waqt ka pata chalanay par ziyada pareshani ka saamna nahi karna padhe ga. Riyasat mein 81 feesad corona mutasireen mein alamaat nahi payi jati hain. Jin mein is waba ki alamaat payi jayen wo laazmi tor par Hospitals se rujoo hon. Ab tak kayi amraaz ka hum ne himmat ke sath saamna kiya hai, Is virus par bhi qaboo panay ki hum mein himmat hai.
Is mauqa par khitaab karte hue wazeer panchayat Raj Dayakar Rao ne ohdedaron ko hidayat di ke is kathen waqt mein challenge ke tour par is ko qubool kiya jaye. Wazeer-e-Aala K Chandrashekhar Rao ne hidayat di hai ke Hospital mein tamam terhan ki sahuliyaat karwai jayen is ke liye Funds ki koi kami nahi hai. Unhoun ne har terhan ki mushkilaat ko khatam karte hue ilaaj ko jari rakhnay ki Doctors ko hidayat di.