Hyderabad: Intzaar karna kisi ko bhi pasand nahi hota hai lekin baaz auqaat taweel intzaar ke baad insaan jhanjalahat ka shikaar honay aur ghusse ki wajah se be qaboo bhi hojata hai lekin aisa bohat kam dekhnay mein aaya hai ke hajamat bananey ke liye taweel intzaar ney kisi gahak ko itna be qaboo kar diya ho ke woh hajjaam par hi hamla kar day. Aisa waqhiya Hyderabad mein paish aaya hai jahan hajamat bananay ke liye taweel intzaar karne ke baad aik noujawan ney hajjaam aur hajamat ki dukaan ke Maalik par hamla kar diya.
Tafseelaat ke mutabiq yeh waqhiya Hyderabad ke maqam NeredNet mein paish aaya jahan Parkash Nami noujawan baal katwane ke liye hair salooan pouncha tha lekin usay taweel intezaar karna pada jis ke baad woh aapay se bahar ho kar Manzoor se behas o takraar shuru kar di aur yeh behas o takraar itni badhi ke Parkash ney Score Driver se Manzoor par hamla kardiya aur beech bachao mein dukaan ka Maalik Kiran ko bhi yeh hamla bardasht karna pada.
Baad azan muqami Police ney aik muqadma darj karte huwe tehqiqaat ka aaghaz kardiya. Yaad rahay ke Hyderabad ke aksar hair saloon mein hajamat bananay ke liye taweel intzaar karna padta hai aur noujawan apne mustaqil hajjaam se paishgi mein hi apni baari ka waqt muqarrar kar lete hain. Is ke ilawa kayi mauqa par hair saloon mein baari ki wajah se behas o takraar bhi mamool ki baaten hain.