New Delhi : Hindustan mein in dinoun gaaye mauzo behas bani hui hai taham is martaba gaaye kisi mazhabi muamlay ki wajah se khabroun mein nahi hai balkay dulhan se iska mawazna kiya ja raha hai. mulk mein dulhan gaaye se bhi sasti hogayi. Haryana aur Punjab mein ladkiyoun ki kami ke baais muqami noujawan arhish, bangal, Jharkhand, bihar aur deegar reyaston sameit padosi mulk nepal se bhi Dulhan laane lagey hain.
Tafseelaat ke mutabiq deegar reyaston aur Nepal se layi jane wali Dulhan gaaye se bhi sasti hain. is waqt hindustani baazaaroun mein achi gaaye ki qeemat 75 hazaar rupay ke qareeb hai lekin dulhan ki qeemat tees se chalees hazaar rupay ke qareeb hai jabkay nepal se layi gayi jeevan saathi pachees hazaar rupay mein bhi dastyab hai.
Haryana mein muqeem sahafi ne inkishaaf kiya hai ke mukhtalif reyaston se Haryana layi jaane wali dulhan ki tadaad bees hazaar se zayed ho chuki hai. ab Haryana mein kisi ko shadi ke liye dulhan darkaar hoti hai to woh Madhya pradesh, maghribi bangal, Jharkhand, himachal pradesh, Andhra prdesh, Telangan, assam sameit deegar reyaston ka rukh karte hain. mazeed sasti dulhan ke liye woh padosi mulk nepal jatay hain jahan gurbat ki wajah se wahan Dulhan mil jati hain jinhein apni jeevan saathi bananay ke liye bees se pachees hazaar ke qareeb akhrajaat bardasht karne padte hain.
Haryana ke har gaon mein aisi Dulhan moujood hain jinhein doosri reyaston se baqaida laya jata hai .
Mewat ke rehaishi 33 sala Sanjay kumar ne kaha hai ke mein ne dulhan ko pachaas hazaar rupay may khareeda hai, kayi baras se shadi ke liye pareshan tha. Mazid kaha ke aisay mein gurgaon ke ek dost ne mashwara diya ke shadi ke liye dulhan nahi mil rahi to khareed lao. is par Sanjay ne bihar ke ek agent ki Maarfat ek biwi khareed li.
Muqami agents ne kaha hai ke chalees se pachaas hazaar rupay ki raqam mein dulhan baasani mil jati hai lekin agar is se kam Umar dulhan darkaar ho to is ki raqam ek laakh rupay se bhi mutajawiz hojati hai jabkay ziyada Umar wali ya mutalqa khawateen ki qeemat sirf das hazaar rupay hai.
Ytn Staff Ke mutabiq Muqami agent ne naam zahir nah karne ki shart par kaha ke ladkiyan Haryana mein baqaida shadi ke liye bechi ja rahi hain aur chunkay Haryana mein shadi ke liye matlooba tadaad mein ladkiyan mojood nahi hain is liye muqami dulha ya unke walidain hum se rabita karte hain. agent ne daawa kiya ke ghurbat ki wajah se yahan log bohat pareshan hain ke jahez kaisay khareedain, betiyon ko kaisay biyah karenge, baration ko bulaa kar khana kaisay khilainge. is liye woh apni betiyon ko farokht karna hi behtar samajte hain. –YTN STAFF