Srinagar : Jammu and Kashmir mein Foujiyoun mein khud kushi karne ke rujhan mein roz bah roz izafah ho raha hai. junoobi Kashmir ke zila shopia ke ilaqay mein aaj ek pera commando ne mubayyana tor apni hi service rifle se apni zindagi ka khatema kiya. tafseelaat ke mutabiq shopian zila mein tainaat 23 pera regiment ke ek commando ne jummay ki subah qareeb saadhay das bajey douran-e-duty mubayyana tor apni hi service rifle se apni zindagi tamam kardi .
Waqea runuma hotay hi unke saathi mazkoorah pera commando ki taraf doday aur unko khoon mein lutt putt dekha. Commando ko naazuk haalat mein nazdeeqi fouji hospital muntaqil kiya gaya jahan doctoron ne inhen murda qarar diya. mahlook fouji ki shanakht pera commando karam jeet singh ke tor par hui hai. darin-e-Isna ek police officer ne waqea ki tasdeeq karte hue kaha ke is silsilay mein ek muqadma darj karkay tehqiqaat shuru ki gayi hain. Qabil-e-zikar hai ke security idaron ki janib se yoga aur art of leaving ki sargarmia muta-arif karwnay ke bawajood bhi jammu kashmir mein tainaat security force ke ohdedaron mein khudkushi ke rujhan mein koi kami nahi aarahi hai .
sabiq markazi wazeer-e-mumlikat baraye difaa subhash ne mah-e-feb mein Rajya sabha mein fouji jawano ki khudkushiyan karne ki tafseelaat faraham karte hue kaha ke saal 2018 ke douran 80 fouji ohdedaron ne khud kushi ki jabkay hawai fouj mein 16 ohdedaron wo behria mein 8 ohdedaron ne khud kushi ki. unhon ne kaha ke saal 2017 mein 75 Foujiyoun ke badey mein Guman kiya jata hai ke unhon ne khud kushi ki hai jabkay saal 2016 mein 104 Foujiyoun ki mout khudkushi karne se waqay hui hai .– YTN STAFF