Hyderabad: Cyberabad Police ne hafta ke roz Hyderabad ke muzafaat mein Shamshabad mein ek khatoon Vaterinary Dr. jesay ijtimai Ismat darri ke baad qatal kiya gaya tha, Is ki ghumshudgi ka maamla darj karne mein takheer ke sabab ek sab Inspector sameit 3 police ehalkaroun ko moattal kar diya.
Cyberabad police commissioner VC Sajjan ne bataya ke police ehalkaroun ko zabar dasti duty se hatadena gaya. Hafta ki raat commissioner ke daftar se jariya ek bayan ke mutabiq, ek mufasil tehqiqaat se maloom huwa hai ke 27 aur 28 November ki raat, Unhoun ne laa pata khatoon se mutaliq FIR darj karne mein takheer ki thi.
M Rawi Kumar, Shamshabad police station ke sab Inspector, P Venu Gopal Reddy aur A. Sathyanarayana Goud, Dono Head Constable, Rajiv Gandhi International Airport ( RGIA ) Police station, Ko aglay ehkamaat tak moattal kar diya gaya hai. Commissioner ne kaha ”Tamam police afsaraan ko ek baar phir hidaayat di gayi hai ke jab bhi police station mein kisi qabil shanakht jurm se mutaliq shikayat mosol hoti hai to wo darj kar len.
Mutasirah ke afrade khandan ne ilzaam lagaya ke jab police ne subah 11 bajey ladki ki ghumshudgi ki report darj karanay ke liye un se rabt kiya to unhoun ne koyi jawab nahi diya. Unhoun ne kaha ke police ne na munasib sawalat pochnay ke ilawa dono thanoun ke mabain daira ikhtiyar ke mamlaat par kaafi waqt zaya kiya. Qaumi commission baraye khawateen ke mutabiq, Police ne mutasirah ladki ki walida se poocha ke kiya is ka kisi se koe rishta hai?
Mutasirah ladki ke lawahiqeen ne ladki ki janib se apni behan ko phone karne ke baad police se rabt kiya tha. Ladki ne phone par bataya tha ke wo Scooty puncher honay ki wajah se Shamshabad mein Tool Gate ke qareeb phas gayi hai. Aur ye bhi kaha tha ke usay dar lag raha hai, Kyun kay ye jagah kaafi weraan hai. –YTN STAFF