Ramallah : Agar aap Falasteen ke tareekhi ilaqay dekhnay ke khwahesh mand hain aur aap ko kisi wajah se wahan jaane ki ijazat na ho ya aap ka budget aap ka sath na deraha ho to aap apni yeh khwahish farzi ek app ke zariye poori kar saktay hain. tafseelaat ke mutabiq Falasteeni technology ke mahireen ne ek nai application tayyar ki hai. yeh aisi application hai jis mein aap ka kuch bhi kharch nahi hota.
Smart mobile ke zariye aap is application ko istemaal karkay Falasteen ke tareekhi maqamat ki sair karsaktay hain.
Arab media ke mutabiq is application ko canaan ka naam diya gaya hai. Europi union ke maali taawun aur Falasteeni society baraye tahaffuz qaumi virsa ki koshisho se yeh application tayyar hosaki hai. iski badolat Falasteeni tamaddun ka taaruf hoga.
Falasteen ke assaar-e-Qadima ko nazar andaaz aur usay tabah karne ki koshisho se bachanay mein bhi madad mileygi. is application ki madad se aap beeet al-muqaddas, garbh urdan aur Gaza patti mein mojood assaar Qadima ki sair kar sakenge. is ke zariye 360 degree tak maqamat ko dekhnay ki sahoolat haasil hai. tareekhi maqamat se mutaliq maloomat bhi muhayya hongi. is app ko Google play store se Falasteen VR type karte hue download kiya jasakta hai.
Technology ke Falasteeni mahireen ne koshish ki hai ke Falasteen mein mojood tareekhi maqamat ko ujagar karen. Israel ke zair qabza ilaaqon ki tareekh se poori duniya ko muta-arif karwaen. Falasteen mein sayahat ke liye hosla afzai karen. is application ki tayari ka khayaal is waqt aaya jab Amrici congress ke 2 arkaan ko Israel anay se roka gaya. Falasteen nazaad Rashida Tulaib aur Amrici Democratic Party ki rukan alhan Umar ko falstinyon ke sath bad sulooki ke pas manzar mein Israel ke boycott ki muhim chalanay par Falasteen anay se rok diya gaya tha. application mein mashriqi al quds, al khaleel, bait al ahem aur Israel ke zair qabza mutadid shehron ke video clip 360 degree ke zawiye se diye gaye hain. unka dorania 4 se 12 minute tak ka hai. yeh application Falasteen institute ke mahireen ne tayyar ki hai. –YTN STAFF