Hyderabad : Rukan-e-parliament Hyderabad wo sadar kul hind majlis-e-ittehad-ul-muslimin Asaduddin Owaisi nay reyasti hukoomat se numaindagi karte hue yeh khwahish ki ke mulazmeen ki hadtaal ko paish-e-nazar rakhtay hue Eid-ul-adha ke zimn mein shehar-e-Hyderabad mein safai ke intizamaa kiye jayen.
Owaisi nay Twitter ke zareya wazeer-e-aala KCR aur TRS ke karguzar sadar KTR ke alawa secretary mehakma baldi nazam wo nasq Arvind Kumar aur commissionaire GHMC se khwahish ki ke janwaroun ka fazla aur kachra ki nikasi ke liye zurori iqdamaat kiye jayen.
Principal secretary baldi nazam wo nasq Aavind Kumar nay bataya ke tamam tar intezamat kar liye gaye hain aur zonal commissionaire charminar un intizamaa ki nigrani kar rahay hain. commissionaire baldia Dana kishore nay bhi Twitter ke zareya Asad owaisi ko bataya ke ”unhoun nay purana shehar ke mukhtalif maqamat wo Eid-gahoun ka doura kiya, safai ke intizamaa mein kisi qisam ki kotahi nahi ki jaye gi.
wazeh rahay ke guzishta ek hafta se sanitation ke workers hadhtaal par hain aur eid se ain qabal hadhtaal ki wajah se shehar mein kachra ki nikasi ka kaam thap ho gaya hai. –YTN STAFF