Berlin: Har shakhs qarz se pareshan rehta hai lekin ab khabar is se bhi pareshan kin hai ke jis mulk ke aap bashinday hain shayad woh bhi bhaari qarzon ke boojh taley daba huwa hai. duniya bhar mein is waqt aksar mumalik intehai maqrooz hain jitne pehlay kabhi nahi they. yeh soorat e haal jald behtar hoti nazar nahi aati. is waqt 122 mumalik qarzon ke boojh taley dabey hue hain jabkay africi mumalik ki haalat to intehai buri hai .
Aalmi satah par mukhtalif mumalik ko darpaish qarzon ki intehai sangeen soorat e haal se mutaliq yeh tafseelaat qarz report 2019 may faraham ki gayi hain, jo jubilee Germany Nami idaray nay german dar-ul-hakoomat Berlin mein paish ki .
Is report ki tayari ke amal mein mahireen ki taraf se duniya ke 154 mumalik ko darpaish maliyati masail ka jaiza liya gaya, jin mein se 122 mumalik’ khatarnaak hadd tak maqrooz’ paye gaye hain. mazeed tashweesh ki baat yeh hai ke 2017 may khatarnaak hadd tak maqrooz mumalik ki tadaad 119 thi, jo 2019 maymazeed teen mumalik ke izafay ke sath 122 ho chuki hai .
Jubilee Germany ek aisi tanzeem hai, jis mein soul society aur kalisai tanzeemon ke numaindon ke kayi group shaamil hain. yeh tanzeem apne tor par tajziyoun , labi aur mushawarat ke zareya is koshish mein hai ke aalmi satah par be tahasha qarzon ki wajah se peda honay walay masail khatam hona chahaiyn .
is report ke mutabiq duniya ka sab se pasmandah aur kam taraqqi Yafta bar-e-azam samjhay jany walay Africa mein to bohat se mumalik ko darpaish qarzon ki bhrani soorat e haal itni sangeen ho chuki hai ke ab un mumalik nay apne zimmay qarzon ki wapsi ke liye pareshan hona aur koi koshishen karna bhi chore diya hai .
jubilee Germany ke mahireen ke mutabiq aalmi satah par qarzon ki yeh soorat e haal itni na umeed kar dainay wali hai ke is ki wajah se har jagah andhera hi nazar aata hai. mazeed tashweesh ki baat yeh bhi hai ke yeh soorat e haal mustaqbil qareeb mein behtar hoti nazar nahi aati aur yeh rujhan bzahir jari rahay ga .
Is report ke musanifeen ke mutabiq qarzon ke hawalay se bain ul aqwami satah par is pareshan kin soorat e haal ki ek wajah yeh bhi hai ke zaroorat mand aur ghareeb mumalik ko mukhtalif aalmi tanzeemon aur Ameer mumalik ki taraf se jo raqum qarz ke tor par faraham ki jati hain, un ke liye sharah sood itni kam rakhi jati hai ke un qarzon ko sastay qarzon ke tor par becha jata hai. lekin is ka nuqsaan yeh hai ke aisay sastay qarzay lainay walay bohat se mumalik aisa karte hue apne mumkina wasail se bhi ziyada badi chhalang laga letay hain jis ki wajah se woh aisay jaal mein phas kar reh jatay hain, jis se niklana un ke liye kabhi mumkin hi nahi hota .
Berlin mein jubilee Germany ke ek markazi ohdedar nay media se kaha hai ke is waqt aalmi satah par mukhtalif mumalik ki madad ke liye nah sirf Dewaliapan ke khilaaf ek mo-asar nizaam ki zaroorat hai balkay qarz dahinda idaron aur Ameer reyaston ko intehai maqrooz mumalik ko naye qarzay dainay par pabandi lagatay hue unke zimmay ziyada tar qarzay maaf bhi kar dena chahaiyn. Shelder nay misaal dete hue kaha ke Africa mein Mozambique jaisay mumalik ko intehai dramayi soorat e haal ka saamna hai. is mulk ki haalat itni kharab aur wahan maali wasail ki itni kami hai ke March ke wast mein anay walay ek tabah kin tufaan ke baad se wahan qareeb do million mutasirah insanon ki koi qabil zikar madad nahi ki ja saki .
Is report ke mutabiq sun 2000 se le kar 2017 hama tak China nay bar-e-azam Africa ke mumalik ko unke haan bunyadi dhanchon ki taamer aur deegar mansoobon ke liye jitne qarzay diye, un ki majmoi maliyat 143 arab euro ya 161 arab Amrici dollar hai. is ke bawajood China Africa ke qarzon se mutaliq masail ke hawalay se koi bohat bada mulk is liye nahi hai ke beijing hukoomat isi arsay mein bohat se africi mumalik ke zimmay be tahasha qarzay maaf bhi kar chuki hai .
Is report ke mutabiq duniya ke 122 intehai maqrooz mumalik ko is waqt jin halaat ka saamna hai, un mein se ziyada tar masail ki wajah aalmi bank, bain ul aqwami maliyati fund ya IMF aur Europi taraqiyati fund jaisay idaron ki taraf se diye jany walay woh qarzay hain, jo aaj bhi riwayati tareeqa car aur sharait ke tehat diye jatay hain. Africa ke alawa asia mein Mongolia, Bahrain Aur Lebanon aur junoobi Asia mein Bhutan aur Pakistan jaisay mumalik ko bhi is waqt reyasti qarzon ki intehai sangeen soorat e haal ka saamna hai .- YTN STAFF