New Delhi: Delhi police ne itwaar ki shaam Javaharlal Nehru University ( JNU ) mein namaloom naqaab posh afraad ki janib se talba ke sath maar pait aur tashadud ke silsilay mein peer ke roz FIR darj ki. Namaloom shar pasandoun ke khilaaf aag zani aur hamla ka muqadma darj kiya gaya. Delhi police ko is muamlay mein bohat si shikayaat masool hui then, Jis ki banyad par ye case banaya gaya. Police zaraye ne is pooray muamlay ki tehqiqaat Crime Branch ko saump di gayi hai.
JNU intizamia ki janib se police ne CCTV footage talabb ki hai. Ek senior ohdedar ne bataya’ Vasant Kunj police station se is muamlay ki tehqiqaat ki jarahi hai. Police ko baen baazu aur ABVP ke talba ki shikayat bhi masool hui hai. Ohdedar ne kaha ”ham un talba ke zareya di gayi tafseelaat ki tasdeeq kar rahay hin“.
Itwaar ki raat, JNU campus mein is waqt tashadud phail gaya, Jab kuch naqaab posh afraad ne JNU ke campus ke andar talba aur Aasateza ko lakdi aur lohay ki salakh se petta, Is waqea mein talba o usatza shadeed zakhmi hogaye, Zakhmi honay waloun ki sahih tadaad maloom nahi hosaki hai, Kam az kam 20 talba ko shadeed zakhmi haalat mein All India Institute of medical sciences mein daakhil kiya gaya tha, Mobayyana tor par zakhmi honay waloun mein talba Union ki sadar taliba Aishe Ghosh bhi shaamil hain.
Police ne 4 bairooni afraad ko campus ke shumali gate se is waqt hirasat mein le liya, Jab wo Aahate se faraar honay ki koshish kar rahay they. Ohdedar ne bataya ”un se pochtach ki jarahi hai.
JNU, Jamia aur Delhi university ke talba aur asatezah ke ek wafad ne Delhi police ke taluqaat aama ke Afsar ko char mutalibaat ke sath darkhwast jama karai hai, Jis mein zakhmioun ko tibbi imdaad faraham karna aur tashadud mein mulawis afraad ki giraftari ka mutalba bhi shaamil hai. Delhi university asatezah Association ke sadar Rajab Rai ne kaha ”Police ne hamein yaqeen dehani karai hai ke wo is muamlay ki tehqiqaat keregi aur hamaray mutalibaat sunegi“. Talba ne police se JNU chodney ka bhi mutalba kiya hai.
Baen baazu ke zair control JNUSU, aur RSS se wabsta ABVP ek dosray par tashadud ka ilzaam laga rahay hai, Isi beech, Mumbai ke mukhtalif collegeoun ke talba ne itwaar ko der raat ”Gate of India “Par jama hue aur unhoun ne JNU mein honay walay tashadud ke khilaaf ehtijaj kiya. Is douran JNU ke talba se izhaar yakjahti ke liye shammen roshan ke. –YTN STAFF