New Delhi : Maghribi Delhi ke Rani Jhansi road ke ilaqa mein itwaar ke roz par hujhoom bazaar mein ek bag bananay wali factory mein aag lagnay ke baad kam az kam 43 afraad halaak aur ek darjan se ziyada zakhmi hogaye. Aag mein jhulas kar marnay walay afraad mazdoor hain. woh factory mein so rahay they ke itwaar ki subah 4:30 se 5 baje ke darmiyan aag lag gayi. Is haadsa mein 60 se ziyada afraad ko bachaya gaya hai aur inhen lok naik Lok Nayak Jai Prakash Narayan Hospital aur Lady Harding Hospital muntaqil kar diya gaya hai.
Mehkama fire ne bataya ke inhen 5:22 ke aas paas phone aaya aur 25 fire tender mauqa par bheje gaye. aag lagnay ki asal wajah ka abhi tak pata nahi chal saka hai, lekin fire hukkaam ne bataya ke yeh short ciruit hosakta hai.
Delhi fire service ke chief Atul Garg ne bataya factory mein lagi is aag mein 40 se ziyada afraad halaak hogaye. aag qareeb ki deegar imaartoun tak phail gayi. halakatoun ki tadaad mein izafah ka khadsha hai. police ne bataya ke bag factory ke maalik ke khilaaf rehaishi ilaqay se bag saazi unit chalanay aur hifazati usooloun ko todnay ke ilzaam mein muqadma darj kiya gaya hai.
Markazi wazeer-e-dakhla Amit Shah ne is waqea ko qeematoun jaanoun ka afsoosnaak nuqsaan qarar diya hai aur mutaliqa ohdedaroun ko hidaayat ke ke woh har tarhan ki madad faraham karen. Delhi ke wazeer-e-aala Arvind Kejriwal ne tweet karte hue, is waqeye ko afsosnaak qarar dete hue kaha hai ke fireman apni poori koshish kar rahay hain, imdadi karwai jari hai. Kejriwal hukoomat ne is atishzadgi waqea mein jaan bahaq honay walay afraad ke lawahiqeen ko 10 laakh rupaye aur zakhmion ko ek laakh rupaye muawza denay ka elaan kiya hai. Daren-asna Delhi ke wazeer-e-aala arvind Kejriwal ne is waqea ki Majestrial tehqiqaat ka hukum diya hai.
BJP ke qaumi car-guzaar sadar JP nadda ne tweet kiya ke ”Rani jhansi road, anaj mandi, Delhi mein aag ke sanihay mein jaan wo maal ke nuqsaan se intahi takleef hui. aag lagnay ka ye waqea Delhi mein aag lagnay ke badey waqea mein se ek hai, jo 13 June 1997 ko junoobi Delhi ke green park ilaqay mein cinema ghar mein lagi aag ke baad paish aaya tha, jis mein 59 afraad halaak hue they, aur 100 se zayed afraad zakhmi hoye they. –YTN STAFF