Hyderabad: ye to sab jantay hain ke siyasi jamaatoun ko kayi badi companiyon ki janib se Funding ( maali taawun ) millti hai jo ke un jamaatoun ko intikhabi muhim se leker kamyabi haasil karne tak darpesh akhrajaat mein sarf hotay hain. Barsar Iqtdar BJP ke mutaliq ab ek inkishaaf huva ke usay ek aisi company se maali taawun haasil huva jis ke khilaaf Mumbai Bomb dhmakoun aur dehshat gardi ke zimn mein tehqiqaat ka saamna karna padh raha hai.
BJP ne ek aisi company se bada chandah haasil kiya hai jis ke khilaaf ab Inforcement Directoriate ( ED ) ki taraf se dehshat gardi ki maali eaanat ki sahoolat faraham karne ki tehqiqaat ki jarahi hain ye inkishaaf khud BJP ke maali aalamyoun se huva hai. RDW Developer Ltd wo company hai jis ka talluq 1993 ke Mumbai bomb dhamakoun ke ek mulzim aur Mafia Boss Davod Ibrahim ke qareebi saathi marhoom Iqbal Memon urf Iqbal Mirchi se jayidadoun ki khareed-o-farokht ki zimma daari maani jarahi hai. BJP ke Election Commission mein faraham kardah tafseelaat ke mutabiq hukmaran jamaat ko is company se paisa diya gaya hai. 2014-15 mein RKW, Jo Dewan Housing Finance Ltd se wabasta thi is ne party ko 10 crore rupay diye
January 2019 mein kobra post ne bhi is ki nishandahi ki thi. Jabkay BJP ko baqaidagi se mukhtalif intikhabi Trustun se badi raqam millti hai, Jo mukhtalif Corporate Houses ke chandah mein kaam karte hain lekin kisi bhi company ne infiradi tor par apna atiyah nahi diya hai. Intikhabi Bonds par jari tanaze ki roshni mein ye baat zehan nasheen rakhni hogi ke agar Modi hukoomat ne 2014-15 mein siyasi lobbying ki is ghum-nami shakal ko pesh nahi kiya hota to shayad RKW ka chandah kabhi manzar aam par nahi aata. Company mein ek sabiq director Ranjit Bindra ko ED ne Underworld ki janib se saudey mein sahoolat faraham karne ke ilzaam ke tehat girftar kiya hai. Khabroun mein ED zaraye ke hawalay se bataya gaya hai ke Bindra ko ek agent ke tor par istemaal kiya gaya hai jis ne mirchi aur farmon ke mabain muahiday karwaye.
ED ke zareya mirchi ki jayidadin, Sunblink Real Estate kharidne ka ilzaam aed karne wali ek company ek aam Directorship ke zareya ek aur company se munsalik hai jis ne BJP ko 2 crore rupay ka atiyah bhi diya tha. MEHUL ANIL BAVISHI Sunblink ke ek director, Spectacular Buildcon Private Limited Nami company mein director bhi hain. Election commission ko dair kardah tafselaat se pata chalta hai ke BJP ko 2014-15 mein Spectacular se 2 crore rupay miley they. RKW developers Director Placid Jacob Naronha jo kay Darshan Developers private ltd ke director Khemka mutaliq EC feling ne inkishaaf kiya ke darshan ne 2016-17 mein BJP ko 7. 5 crore rupiye ki imdaad di thi
India today ki ek report mein kaha gaya hai ke ED bhi is muamlay mein jacob ke kirdaar ki tehqiqaat kar rahi hai. ED ka ilzaam hai ke RKW Developers ne mirchi ki jayidadoun ki farokht mein aasani faraham ki thi aur Bindra ne mobayyana tor par 30 crore rupiye ka commission liya tha. Agency ne adakara shilpa shetty ke shohar Raj Kundra se bhi RKW Developers ke sath mamlaat karne par pooch tach ki. shetty ek firm, Essential Hospitality mein director reh chuke jis ka RKW Developers ke sath lain deen tha. Maharashra Assembly intikhabaat ke silsilay mein Iqbal mirchi muqadma guzashta mah ek mutanazia masla tha. ED tehqiqaat ka talluq Iqbal mirchi, Millennium Developers ( Nationalist congress party ke rehnuma Praful Patel ki malkiat wali firm ) aur Sunblink ke mabain jaedad ke lain deen se hai.
Tafteesh ka aaghaz Maharashtra intikhabaat se qabal hi huva tha aur agency ne yahan tak ke Patel se pooch tach ki thi aur 2 afraad ko giraftar kiya tha, Jin mein Bindra bhi bhi shaamil hai. Patel ne kisi bhi ghalat harkat ki sakhti se tardeed ki hai. Mirchi ke bhabi Mukhtaar Memon se ED ne Sunblink Real state private ltd aur Millennium Developers private ltd ko Mirchi ki jayidadoun ki farokht ke silsilay mein pooch tach ki thi. Guzashta mah ED ne 2186 crore rupay ke karz ke silsilay mein chodan DHFL ihatay mein chhapa mara tha khayaal hai ke jis ki agency markaz Dubai muntakil kardiya gaya tha.
Business Today ki ek mazmoon ne ED ke namaloom ohdedaroun ke hawalay se daawa kiya hai ke Bindra ne Sunblink ke liye Mirchi ke sath jaedad ke lain deen par baat cheet karne ka aitraaf kiya hai. Maharashtra mein apni aakhri intikhabi rally mein Wazeer-e-Azam Narendra Modi ne NCP par Mumbai bomb dhamakay ke mutasireen ke sath insaaf nahi karne ka ilzaam aed kiya tha. Hum Mumbai bomb dhmakoun ke zakhamo ko nahi bhool satke. Is waqt ki hukoomat ne mutasirah afraad ke ahal khanah ke sath insaaf nahi kiya tha aur ab is terhan ke muaqqaf ki wajah maloom hoti jarahi hai. Unhon ne dehshat gard hamloun ke zimma daaroun ko giraftar karne ke bajaye Iqtidaar mein anay walay afraad ko phir Iqbal Mirchi ke kaarobar mein mulawis kiya.
Times of India ki ek report mein markazi wazeer-e-dakhla Amit Shah ke hawalay se kaha gaya hai ke Iqbal Mirchi ke sath farmoun ka maamla ghaddari se kam nahi hai. Shah ke hawalay se tehrer karda mazameen ab media ke khilaaf hukum imtinai ke baad Times of India ki Website par dastyab nahi hain. Taham mazkoorah akhbar ke ye mazameen ab bhi Press Reader.com ke zariye dastyab hai aur Shah ka tabsarah times Now ki Website par dekha ja sakta hai. Is muamlay mein Bindra ke ilawa ek Bartanwi shehri Haroon Yousuf ko bhi giraftar kiya gaya hai. Khabroun ke mutabiq Bindra ne araazi ke muahiday ke liye Agent ki hesiyat se kaam kiya jabkay Yousuf ne raqam ek trust mein muntakil ki aur is muahiday mein sahoolat faraham ki.-YTN STAFF