Hyderabad: Telangana State Higher Education ki Council ne faisla kiya hai ke is saal Degree ke pehlay ya dosray saal mein koi bhi taalib ilm roka nahi jayega. Osmania University ne apne Social Media Handle ke zariye talba ko Council ke faislay se aagah kiya. Mulk bhar mein Lockdown ke darmain, Jis ne University ya College ke imtehanaat ko ghair muayana muddat tak multawi karne par majbor kiya hai lehaza Telangana ne pehlay ya dosray saal mein padhnay walay tamam Degree talba ko aglay saal ki taraqqi dainay ka faisla kiya hai. Taham talba ko aglay saal apne Backlog mein kamyabi haasil karne ki zaroorat hogi.
Council ne ye bhi wazeh kiya hai ke is saal 50% Credit usool laago nahi hoga. Is usool mein kaha gaya hai ke aglay saal taraqqi yafta honay ke liye pehlay aur dosray saal ke talba ko kam az kam 50 feesad credit haasil karne ki zaroorat hai. Council ek waqt ki astasna day rahi hai aur is zabita ka itlaq mojooda taleemi saal ke pehlay ya dosray saal mein talba ke liye hai. Telangana State Council of Higher Education ( TSCHE ) ke Chairman, Professor T Papi Reddy ne kaha ke agarchay Degree ke imtehanaat hotay bhi thay to pehlay ya dosray saal mein kisi bhi taalib ilm ko isi jamaat mein roka nahi jata balkay usay agli jamaat mein taraqqi di jati lekin Final Year se qabal usay apne un imtehanaat ko kamyaab karna hota hai jis mein wo taleemi saal ke douran nakaam huwa tha. Teesray saal ke talba ke liye unhoun ne kaha ke inhen Degree ke husool ke liye tamam imtehanaat kamyaab karne ki zaroorat hogi.
Coronavirus bohraan ki wajah se Telangana mein University aur College ke imtehanaat ko UGC ke hukum ke mutabiq multawi kardiya gaya hai. Riyasat mein Universities aur Colleges ne tadrees ke Online tareeqoun pur amal pera hai. Osmania University ne apne Faculty members ko hidayat di hai ke wo Online tedrisi wasail istemaal karen aur baqi nisaab April ke aakhir tak mukammal karen. –YTN STAFF