Hyderabad: Corona ke teeka ke liye hyderabad ko ek aalmi maqam haasil hua hai aur aaj berooni mumalik se aaye safeeron aur aala ohdedaron ne Bharat biotech company pohanche aur yahan muaina kiya kyunkay yahan corona ka teeka tayyar kiya jarha hai.
Darin asna 64 mumalik ke safeeron aur high commissioners ne teeka ke baaz ahem tehqeeqi nakaat aur masrofiyat se waqfiyat haasil ki.
Yahan is baat ka tazkara bhi ahem hai ke ye wafad nai Dehli se khusoosi tayyarah mein hyderabad ke Shamshabad aiprot pohancha. airport se wafad khusoosi buses ke zareya Bharat biotech aur biological limited pohancha.
Is mauqa par is teeka ki tayari aur iski sarbarahi ke silsila mein telangana ki salahiyaton ko batanay ke liye presentation bhi diya gaya. Berooni mumalik ke wafood ne muqami science danon se corona ke teeka ki tayari ki tafseelaat bhi haasil kee. Hyderabad ka dora karne walay wafad mein bhutan aur Afghanistan ke numaindon ke alawa junoobi Korea aur africi mumalik ke numainday bhi shaamil hain.
yaad rahay ke guzishta hafta wazeer e azam Narendra Modi ne Bharat biotech ka doura kiya tha taakay corona ke teeka ki tayari ka muaina kya jasakay.
Bharat biotech company ki janib se indian council of medical research ke ishtiraaq se corona vaccine ki tayari ki jarahi hai. is teeka ko insanon par tajurbah ka kam hyderabad ke NIMS dawakhana mein jari hai.