Hyderabad: Sabiq rukan Assembly jo Covid-19 se mutasir they, Hospital muntaqili ke douran chal basey. CPM ke Senior leader 59 sala S.Rajiah jinhon ney 3 martaba 1999, 2004, 2014 mein Assembly mein Bhadrachalam halqa ki numaindagi ki chand din qabal aleel hogaye they, Is par koi khatrah nah mol letay hue un ke arkaan khandan ney un ka guzashta roz corona ka test karwaya jis par un ki report misbet payi gayi. Un ko Bhadrachalam se Vijayawada ke hospital le jaya jaraha tha ke rasta mein hi un ki mout hogayi. Un ke 2 betay aur ek damaad bhi coronavirus se misbet paye gaye jin ka ellan Rajahmundry mai kiya jaraha hai.
CPM ke leaders ney un ki mout par gehray dukh ka izhaar kiya aur awam-o-party ke liye un ki khidmaat ko yaad kiya. Party leaders ney un ke ghumzdaa arkaan khandan se taaziyat ka bhi izhaar kiya. Wazeh rahay ke haal hi mein riyasat mein kayi awaami numainday Corona se mutasir hue hain.