New Delhi : Congress party ki janib se jari kiye gaye intikhabi manshoor par BJP ney sakht tanqeed ki hai. markazi wazer-e-khazana Arun Jaitley ney lok sabha intikhabaat ke liye jari, congress ke manshoor mein kiye gaye waday ko khatarnaak bataya .
Arun Jaitley ney kaha ke congress ke manshoor mein mein jo idea hai woh khatarnaak hai. Rahul Gandhi ke doston ney jo manshoor banaya hai woh jammu Kashmir aur mulk ke tahaffuz ke liye sahi nahi hai. unhoun ney kaha ke Rahul Gandhi ney kaha hai ke woh jo waday karte hain se laago karte hain. is manshoor mein aisay agenday hain jo mulk ko todnay ka kaam karte hain .
Jaitley ney kaha ke sabiq mein congress party aur nehru gandhi khandan ney jammu Kashmir ke talluq se jo faisla kiya tha, woh tareekhi bhool thi. is ke liye mulk inhen maaf nahi kar sakta. is agenday ko aur khatarnaak tareeqay se agay badhaane ki tayari hai .- YTN STAFF