Aligarh : Uttar pradesh ke Aligarh zila mein mangal ke roz CISF ke ek jawan ney apni ahliya ko mubayyana tor par zeher day kar maarne ke baad khud bhi khud kushi karne ki koshish ki. mazkorah jawan, Ajit Aligarh ke ek hospital mein apni zindagi ki jung ladh raha hai.
Yeh afsosnaak waqea is waqt samnay aaya, jab yahan kasimpur power house mein tainaat ajit ney mangal ke roz kaam par nahi aaya aur koi khabar bhi nahi di thi. CISF ka ek aur jawan tafteesh ke liye iske ghar gaya, lekin jab ghar ke andar se koi jawab nahi mila to is ney police ko mutala kar diya.
32 sala Ajit kumar ki haalat tashweesh-naak hai, jabkay 30 sala iski ahliya joly is waqt murda haalat mein payi gayi, jab police ney unke ghar ka darwaaza toadh diya. ibtidayi tafteesh mein inkishaaf hua hai ke Patna ka rehaishi ajit pichle 2 saloun se afsurdagi ke daur se guzar raha tha. usay apni biwi ke kisi ghair mard ke sath najaaiz taluqaat honay ka shoba tha.
Police ko diye gaye apne bayan mein Ajit ney bataya ke is ney apni biwi ko sulphurs ki golian di theen aur khud bhi wohi kha liya tha. is ney mazeed kaha ke ”us ney apne ghar ka darwaaza undar se band kar diya tha aur chabiyan pheink di theen. is jodey ka ek do saal ka beta hai. circle officer ney bataya ke khatoon ki laash ko post mortem ke liye hospital bhej diya gaya aur jodey ke kumba ke afraad ko is baare mein ittila di gayi hai. –YTN STAFF