Amravathi : BJP ke qaumi saddar Amit Shah ne Andhra pradesh ke wazeer-e-aala N ChandraBabu Naidu ko mulk ke sab se bade mauqa parast qaraar diya. Guntur zila ke Narsaraopet mein party ki rally se khitaab karte hue unhoun ne kaha ke TDP party ne 2014 mein BJP ke sath haath milaya tha kyunkay mulk mein Modi lehar chal rahi thi. BJP leader ne ilzaam lagaya ke pichlle saal, Naidu ne BJP ki qiyadat wali NDA se haath kheench liya. aur NDA ke khilaaf be bunyaad ilzamaat laga kar logon ko gumraah karne ki koshish ki .
Amit Shah ne kaha ke’ is baar NDA Naidu ke liye –apne darwazay nahi khole ga. aisa lag raha hai ke woh NDA mein shaamil honay ki koshish kar satke hain, lekin ab hum ne unke liye hamesha ke liye darwazay band kar diye hain . BJP leader amit Shah ne kaha ke ChandraBabu Naidu ke mauqa parast honay ki kayi misalein hain. aur kaha ke’ ‘ 1983 mein Naidu ne congress party chod di thi aur –apne sasur NT Rama Rao ki party TDP mein shaamil ho gaye they. aur baad mein un ke hi Iqtidaar par qabza kar liya . Shah ne yeh bhi kaha ke Naidu 1999 mein NDA mein shaamil hoye they jab vajpayee lehar thi, lekin 2004 mein Iqtidaar gunwanay ke baad unhon ne ittehaad ko chodh diya .
Shah ne kaha ke Telangana assembly intikhabaat mein TDP sarbarah ne congress se haath milaya, lekin is ittehaad ko buri tarha nakami mili. unhon ne congress ko dhool chata di. aur Andhra pradesh mein is ke sath ittehaad karne se inkaar kar diya. Amit Shah ne kaha ke TDP aur Y S R Congress party dono hi khandani jamaten hain jo corruption se bhari hain .-YTN STAFF