Amaravati : Andhra Pradesh ke Chittoor zila mein hafta ke roz car ke ulat jaaney se is mein sawaar ek hi khandan ke paanch afraad halaak aur ek zakhmi ho gaya.
Mehlookeen mein 3 bachay aur 2 khawateen shaamil hain. yeh afsoosnaak waqea Mamudugu gaon ke qareeb is waqt paish aaya jab yeh kumba Tirupati se Bangalore ja raha tha.
Mazkoorah car ka driver Vishnu, car ka control kho baetha, jiske nateejay mein car ulat gayi aur gadi ko aag lag gayi. is haadsay mein jhulas kar zakhmi honay walay Vishnu ko tirupati ke hospital muntaqil kardiya gaya.
Police ke mutabiq, haadsay mein Vishnu ki biwi, ek beta, ek beti, behan aur bhateeja halaak hue hain. –YTN STAFF