Hyderabad: Salana tehwar Bonalu ke juloos ke liye hathi ‘Rajjni’ ko istemaal nah karne ke riyasti hukoomat ke haliya faisla ke baad hathi par mataa ghatam ke sath bonalu juloos ke liye, shehar ke aqeedat mand pur josh hain. Woh riyasti hukoomat par zor day rahay hain ke riyasti wazeer aala K Chandrashekhar Rao jolus ke liye Rajjni hathi laane ka iqdaam karen.
Yeh baat qabil zikar hai ke Akkanna Madanna Temple ney itwaar 28 July ko Bonalu tehwar aur Sri Mahakali Jatra, aur peer 29 July ko juloos ke kamiyaab ineqad ke liye tamam intezamat kiye hain. Judwaa shehron hyderabad aur Secundrabad ke aqeedat mand aashirwad lainay ke liye atay hain. Un ki sahoolat ke liye intizamaa kiye gaye hain.
Bonalu juloos ke liye aqeedat mandoon ki khwahish ko dekhte huwe Nehru Zological Authority aur intizami shoba ke ohdedar riyasat Karnatak ke Bhelgum shehar ke Ram Durgah ke Chipla Kati ke Mahalaxmi dewasthanam se aik dosray hathi ”Sudha“ ko laane ki koshish kar rahay hain. Yeh hathi hafta ki raat ko Hyderabad laaye jaane ki umeed hai.
Mazkoorah hathi Sudha itwaar 28 July ko, Nalapochama Mandir, Sabzi mandi ke Bonalu juloos mein hissa le ga. Aur 29 July ko Akkanna Madanna Mahakali Mandir, Purana shehar ke bonalu juloos mein hissa le ga. Lekin muqami aqeedat mandoon ney wazeer aala se appeal ki hai ke woh is salana tehwar mein logon ke jazbaat ka khayaal karte huwe juloos ke liye hathi rajjni ke liye iqdaam karen.