Hyderabad: Royal Challengers Bangalore ke Hyderabad se talluq rakhnay walay fast Baller aur guzashta muqablay mein Man Of The Match rahay Mohammed Siraj jinhon ne IPL Season 13 mein Kolkata Knight Riders ke khilaaf 8 runs day kar 3 ahem Wickets haasil karte hue Record banaya hai woh is khushi mein apni team ke khiladion ko mandi khilanay ke khawahish mand hain. Mohammad Siraj IPL ki tareekh ke pehlay Bowler ban gaye jinhon ne lagataar 2 Meden Overs daaley aur 3 wickets haasil kee. Yeh Match Abu Dhabi ke Sheikh Zaid Stadium mein khela gaya tha. Unhoun ne Man Of The Match ke baad Harsha Bhogle jo khud Hyderabadi hain un se khalis Hyderabadi andaaz mein baat ki.
Harsha Bhogle bhi un se Hyderabadi lab-o-lehja mein sawal karte hue lutaf mehsoos kar rahay thay. Siraj se Bhogle ne poocha ke Chinnaswamy Stadium mein bowling kar rahay hain aap, Yahan par aap ko bowling karte hue bada maza aaya honga? Is sawal ka jawab dete hue Mohammed Siraj ne kaha ke pehlay to mein Allah ka bohat shukar ada karta hon, Virat bhai mujhe naya ball ( gaind ) diye. Mein naye ball se bohat ziyada practice kar raha tha. Mujhe abhi mauqa mila to bhoot ( bohat ) ancha laga. Harsha Bhogle ne jab un se sawal kia keh aap ku andazh tha ke aap ko ( day ree bol ke ) bowling ka mauqa diya jaye ga to unhoun ne kaha nahi pata nahi tha jaisa field par gaye to Virat bhai bolay ke Miyan, Reddy hujao, Jis par maza letay hue Bhogle ne kaha bilkul apni zabaan mein bolay miyan Reddy hujao bol ke.
Bhogle ne ek aur sawal Hyderabadi andaaz mein karte hue poocha ke is saal kya baat hai RCB mein ke kuch allag mahol hai jo bhi aare logan ancha karre ( acha muzahira kar rahay hain )? jis par Siraj ne kaha mahol tu buhat hi acha hai. Mahol bhi acha hai. Har koi ek dosray ko Support karra ha hai. Ek dosray se baat kar raha hai to bohat hi acha lag raha hai. Har koi aara performance karra tu Players ko aur team ko bhi allag hi boast milra. Harsha ne ek aur sawal karte hue kaha ke is match mein koi khaas baal hai jo aap ko yaad rahay ga to Siraj ne kaha ke Nitish Rana ka baal bohat hi acha tha. Jo soncha tha woh huwa aur wicket bhi mili.
Aakhri sawal Harsha Bhogle ne Hyderabadi andaaz mein kehte hue poocha, Biryani khelare aaj un logon Ko ( team ke arkaan ko Biryani khilain ge kya ) Jis par Siraj ne hanstay hue kaha Biryani ka tu mushkil dekra hai, Mandi khelasakte yaan pay, Is season ke dosray matchon ke muqaabla Mohammad Siraj ne KKR ke match mein apna behtar muzahira kiya. Mohammad Siraj ke is se pehlay ke IPL ke season khaas nahi rahay thay taham unhoun ne is season mein khailay gaye match mein kaafi behtar muzahira kiya. Raat 11 bajey tak chalay is match mein Royal Challengers Bangalore ki team ne Kolkata Knight Riders ko 8 wicket se shikast di. Is match mein unhoun ne 3 ahem wicket liye jis ke liye un ko man Of The Match diya gaya. Points ke aitbaar se Royal Challengers Bangalore dosray number par hai.