Kolkata: Bar-sir Iqtidaar Trinamool congress ne shehriat tarmeemi act 2019 ( CAA ) ke khilaaf maghribi Bengal mein hafta ke roz dharna diya aur ehtejaji muzahiron ka ihtimaam kiya, jis mein party ke rehnumao aur kaarkunon ne riyasat ke tamam 294 assembly halqon mein honay walay muzahiron mein hissa liya.
Qadeerpur crossing par ek muzahiray mein hissa letay hue, wazeer mumlikat Farhad hakeem ne kaha ke ”CAA aur mulk bhar mein mumkina NRC ke zareya NDA hukoomat mulk ko taqseem karne ki koshish kar rahi hai. party ke deegar senior qaideen aur wazraa ne riyasat ke mukhtalif hissoun mein programme mein hissa liya. –YTN STAFF