Cairo: Bachay kabhi khamoshi ke sath wo kaam anjaam de dete hain jis ka kabhi hamein gumaan bhi nahi hota, Kabhi un ke karname misbet hotay hain to kabhi nuqsaan bardasht karne walay hotay hain lekin Misar ke shehar mein ek aisa waqea runuma huva jahan bachay ki khamosh karkardagi ne Maa ke qaatil apne hi Bap ke khilaaf saboot faraham kardiye.
Misri Delta ke Dakahlia soobay mein qatal ki ek aisi waardaat samnay aayi hai jisay sun kar kisi film ka gumaan hota hai. Tafseelaat ke mutabiq Misri shohar ne apni biwi ko qatal karkay waardaat ko chupaney ki koshish ki. Misar ke Security ohdedar tamam tar tajarbay ke bawajood heran they ke is moamma ko kis terhan suljhayen.
Dakahlia ki Police ko talqa tehseel ke kiraye ke ek makaan se ek khatoon ki laash mili thi. Jis ki Report Abeer nami khatoon ke bhai ne darj karwai thi. Ibtidayi maayne se pata chala ke mout tabee nahi. Abeer ke chehray aur gardan par neelay nishanaat nazar arhay they. Sar photne ke nishanaat bhi wazeh they.
Ghar ke darwazay aur khidkiyan sahi salamat the. Manzar nama zahir karta tha ke khatoon par kisi baher se anay walay shakhs ne tashadud nahi kiya. Jo kuch huva hai wo ghar ke andar hi huva hai. Police ne qatal ke waqea ka moamma suljhanay ke liye Team tashkeel di aur shohar ko qatal ke waqea ka zimma daar qarar diya gaya. Misri khawind ke vahem o gumaan mein bhi nah tha ke is ka nosalh beta apne Mobile Camera mein tamam waardaat Record kiye huve hai. Douran tafteesh beta samnay aaya aur is ne ye keh kar sab ko heran kardiya ke mera Bap hi meri Maa ka qaatil hai. Betay ne apne Mobile se video Clip Police ke samnay rakh di. Na qabil tardeed saboot dekh kar mulzim ne iqbal jurm karliya. –YTN STAFF