Lucknow : Uttar pradesh ke Rampur se rukan-e-parliment Azam Khan ke ghar par revenue inspector ne notice chispan kiya hai. is notice mein likha gaya hai ke ”Azam Khan ki ahliya Tazeem fatima, unke betay Abdullah Azam Khan aur Adeeb Azam Khan par kisanoun ki zameen zabardasti Jauhar university mein shaamil karne ke khilaaf muqadma darj kiya gaya hai, chunkay aap muolana Mohammad Ali Jauhar trust ke secretary aur rukan hain, lehaza 3 din ke andar is maamla par apna bayan qalamband karen.
Wazeh ho ke Azam Khan ke ghar par is tarhan ke paanch notice chispan kiye gaye hain. pehla notice Rampur ke SSP ne chispan kiya tha, jis mein Azam Khan par ilzaam lagaya gaya tha ke woh apni sarkari security chodh kar kahin bhi atay jatay hain, lehaza unki jaan ko khatrah hai. is liye aisa karne se baz aajayen. Dosra notice adalat ka Saman tha, jo Azam Khan ke khilaaf ishtial angaiz taqreerein karne par dair muqadmay se mutaliq tha aur ab teen notice jari kar diye gaye hain.
Jauhar university mein zameen ke qabzay ke silsilay mein police ne guzishta haftay Azam Khan ki behan ko bhi hirasat mein leker poch tach ki thi. unki behan mazkoorah trust mein khazanchi theen. is ke alawa aap ko batadein ke pichle kuch arsa ke douran yogi hukoomat ne Azam Khan par 80 se zaied muqadmay darj kara diye hain. un muqadmoun mein ishtial angaiz taqreerein karne, zameen qabza karne kitaab chori, bijli chor, yahan tak ke bhains chori karne ke bhi muqadmay hai. yogi hukoomat inhen mafia qarar diya hai. –YTN STAFF