Hyderabad. Caretaker Chief Minister Mr. K. Chandrashekar Rao (KCR) ney un se numayindagi karne walay Jamat e Islami ke wafad ko yeh tayaqun diya ke Telangana Rashtra Samithi apne intikhabi manshoor mein Aqliaton ke liye Sub Plan ka elaan kere gi aur Aqliaton ki behbood ke liye mawazna mein khatir khuwa gunjaish faraham ki jaye gi. Mr. Chandrashekar Rao ney yeh bhi tayaqun diya ke un ki party apne Secular kirdaar ko kabhi nahi khoye gi aur mabaad intikhabaat bhi BJP jaisi firqa parast partiyon se mafahmat nahi kere gi. janab Hamid Mohammad Khan sadar Jamat e Islami Hind Telangana wo Andhra Pradesh ki zair e qayadat aik aath rukni wafad ney aaj yahan Pragati Bhavan mein Caretaker Chief Minister se mulaqaat karte hue apna manshoor e mutalibaat bhi paish kya. Chief Minister ney wafad ke sath taqreeban teen ghanton tak musalmanoon ko darpesh mukhtalif masayel jaisay Musalmanoon ki taleemi pasmandagi aur muashi khud ikhtiyaari aur rozgar jaisay masayel par tafseeli taur par tabadlah khayaal kiya. Jamat e Islami ke qayideen ney Chief Minister par yeh wazeh kardiya ke maazi mein TRS ka rawayya kuch aisa raha jis se yeh ta-assur paida honay laga hai ke woh BJP ke tayin naram gosha rakhti hai. Wafad ney do toak andaaz mein kah diya ke Shariat mein mudakhilat ki koshishon ko hargiz bardasht nahi kiya ja sakta. Jo bhi party aisi koshish karti hai ya aisay iqdamaat par khamoshi ikhtiyar krliti hai Musalman uss party ko vote nahi dey sakte. Mr. Chandrashekar Rao ney wafad ko Aqliaton ke liye Sub Plan ki manzoori ke alawa Telangana Minorities Residential Educational Institutions Society (TMREIS) ko degree ki satah taq wusat dainay, iss idaara mein tamam maqlua jayidadon par taqarrurat ke liye umeedwaron ke liye yeh laazim kya jaye ga woh degree tak Urdu batoaur e doosri zabaan taleem paaye hon. Mr. Chandar shkhr Rao ney un idaron ki tadaad mein mazeed izafah karne ke alawa Municipal Corporation, Municipalties aur deegar Boards aur Corporations mein Musalmanoon ko khatir khuwa numayindagi di jaye gi. Bataya jata hai ke Jamat e Islami Hind ney Telangana mein Assembly intikhabaat ke paish e nazar aik 8 rukni committee tashkeel di hai aur usay majaz banaya hai ke woh mukhtalif pehloun ka jaiza letay hue intikhabi hikmat e amli tye kere. yeh committee Mr. Chandrashekar Rao se hui baat cheet par aik mufasil report tayyar karkay markazi qayadat ko rawana kere gi jis ki bunyaad par yeh faisla kya jaye ga ke intikhabaat mein kaunsi siyasi party ki taied ki jaye. Wafad mein janab Basit Anwar, janab Malik Motasim , janab M. N Baig Zahid , janab Mohammad Azhar, janab Khalid Mubashir uz Zafar, janab Mohammed Sadiq aur janab Abdul Jabbar Siddiqui ke alawa Caretaker hukoomat mein deputy Chief Minister Mr. Mahmood Ali bhi mojood thae.