Amaravati : Andhra Pradesh ke hukkaam ne hafta ke roz Andhra Pradesh ke sabiq wazeer-e-aala N.Chandrababu Naidu ke rehaish Pazeer ghar ko munhadim karne ka notice diya.
Andhra Pradesh Capital Region Development Authority (APCRDA) neh ghar ke malik Lingamaneni Ramesh se kaha hai ke woh saat din ke andar ghair majaz tameeraat ko hata day, nahi to APCRDA usay munhadim kar degi.
Is se qabal 27 June ko bhi makaan maalik ko wajah batao notice jari kiya gaya tha. taaza tareen notice mein bataya gaya hai ke maalik makaan ki janib se jo jawab diya gaya tha, woh authority ke liye itminan bakhash nahi hai.
Notice mein ground floor aur pehli manzil mein ghair majaz RCC rehaishi imaarton ke sath sath swimming pool aur ground floor mein dressing room ki bhi nishandahi ki gayi hai.
Naidu 2016 se hyderabad se yahan muntaqil honay ke baad se lease par ghar mein rahaish pazeer they. baad mein inhen Praja Vedika mil gaya tha. Wazeer-e-aala Y S jagan mohan reddy neh June mein Praja Vedika ko masmaar karne ka hukum diya tha. unhon neh yeh bhi ilzaam lagaya tha ke Naidu khud ek ghair qanooni makaan mein reh rahay hain. TDP neh ilzaam lagaya tha ke hukoomat siyasi intiqam ke sath kaam kar rahi hai. –YTN STAFF