Aligarh : Ilaaj ki gharz se Kannauj se Aligarh ja rahay ek muslim khandan par chaharshambe ko Aligarh railway station par na-maloom afraad ke hujhoom ney hamla kar diya, aur maar peet shuru kardi.
Is hamla mein zakhmi ho ney walon ke JN medical college ke niji hospital mein daakhil karaya gaya hai. ittila ke mutabiq Mau-Anand Vihar train mein kuch musafir Aligarh jarahay they, tab train se utartey hi tanaza shuru ho gaya.
Mutasireen ke mutabiq chaharshambe ke roz Aligarh Railway Station par train se utartay hi 20 se 25 afraad ney un par hamla kardiya. unhon ney kaha ke un afraad ka taaluq kisi tanzeem se tha jo apne galey mein ek hi qisam ka scarf lapete hue they. police ohdedar ne bataya ke mutasirah afraad ka bayan record karliya gaya hai aur zurori karwai ki jayegi.
Mutasirah muslim afraad ney ilzam lagaya hai ke Railway Station par police ahelkar inehn bachanay ke bajaye apne mobile phone par is waqeye ki video bana rahay they. hujhoom ke jaanay ke baad police zakhmiyoun ko hospital legayi. un mutasirah muslim khandan ke kuch afraad ko sir mein shadeed zakham lagey hain. kuch logoun ney is waqeye ko firqa waranah tashadud ka maamla qarar diya, Jabkay deputy commissionaire ney usay Mob lynching ka maamla maan-ne se inkaar kiya. –YTN STAFF