Hyderabad : Kul hind majlis-e-ittehaad ul muslimin ke rehnuma Akbaruddin Owaisi ney hafta ke roz reyasti assembly mein salana budget par behas ke douran, Kaleshwaram lift aab paashi project ki taamer par reyasti hukoomat ki tareef ki. aur is project ko mulk ka fakhr qarar diya.
Unhon ney kaha ke GST ke nifaz ney mulk ke tamam ilaqon ko mutasir kiya hai. unhon ney ilzaam lagaya ke markazi hukoomat ney mission Bhagiratha aur mission Kakatiya jaisi schemes ki himayat nahi ki.
Majalsi qaied ney kaha ke reyasti hukoomat ney bohat saari maali rukavaton ka saamna karne ke bawajood un schemes ko mukammal kiya hai. unhon ney ilzaam lagaya ke riyasat ke pasmandah ilaqon ko unki taraqqi ke liye markaz se koi taraqiyati fund nahi mila hai. taham, Owaisi ney aiteraaf kiya ke muashi bad haali ney riyasat ko bhi mutasir kiya hai.
Unhon ney paish goi ki ke TRS aindah municipal intikhabaat mein bhaari aksariyat se kamyabi haasil karegi. unhon ney reyasti hukoomat se riyasat mein urdu zabaan ke tahaffuz ke liye iqdamaat karne ki appeal ki. –YTN STAFF