Hyderabad: T-16 Winter League Tournament ke dosray Season mein Sun Net Always Professional ke jarehana opener Aijaz Ahmed ne barq-e raftaar century score karte hue RP Royals ke khilaaf muqarara 16 Overs mein matlooba nishana 165 ko aasaan kardiya. Pehlay Batting karte hue R.P Rayals ne Feroz ki nisf century ( 70 ) ki badolat 8 wicketoun ke nuqsaan par 164 / 8 ka himaliyai score banaya. Sun net ke liye captain Hasan ne 4 Overs ke kota mein 20 runs day kar 2 wicketoun ki kamyaab bowling ki jabkay Mujeeb ne 27 runs ke Awaiz 3 khiladioun ko out kiya.
Jawabi Inning mein Man of The Match Aijaz ne 44 gaindoun mein 10 chowkoun aur 9 chakkoun ki madad se barq-e raftaar aur na qabil taskheer 111 runs score kiye jin ke sath Mujeeb ne 26 gaindoun mein 35 runs ka sath diya aur Sun Net ne 12.4 Overs mein 2 wicketoun par matlooba nishana 165 haasil karliya. Is kamyabi ke sath Sun Net team 6 teamoun ke is Tournament mein 3 muqabloun mein shirkat ke baad 2 fatehat ke zareya teesray maqam par fayez hugayi hai.
Darin asna Mohammed Aksam ( Aamir ) ki zir e qayadat Safa 11 ne ibtidayi tenu muqabloun mein na qabil e shikast rehtay hue badastoor pehlay maqam par apni hukmarani barqarar rakhi hai. Difai Champion Verukarvadas 2 fatehat ke baad behtar Run Rate ki wajah se dosray maqam par hai. Yaad rahe ke Round Robin par khailay jarahay is Tournament ki sare fehrist 2 temen final mein rasai haasil karen gi. –YTN STAFF