Hyderabad: Shehar-e-Hyderabad ki choti badi masjidoun ko aaj dulhan ki tarha saja diya gaya hai kyunkay har shakhs aaj raat shab-e-baraat ka khairr maqdam karne ke liye par josh aur mukammal tor par tayyar hai. dono shehron ke har muhallay ki har choti badi masjid mein shab-e-baraat ke mauqa par mukhtalif mazhabi taqarib, bayanaat, mahfel-e-naat, nawafil aur tilawat Quran-e-Majeed ka ihtimaam kiya jata hai taakay is muqaddas raat mein hum ziyada se ziyada ibadat karte hue Allah rab-ul-izzat ki khushnodi haasil kar saken lekin har jaagne ki raat ka ek siyah pehlu bhi hai jis mein noujawanon ki toliyan tank band aur khaas kar Necklace road par bike riding, cheekh-o-pukaar aur toliyon ki shakal mein mukhtalif khel kood mein masroof rehtay hain. noujawanon ki yeh harkatein nah sirf unke liye deen aur duniya ki tabahi ka samaan hai balkay un harkato ki wajah se duniya ko aur khaas kar shehar-e-hyderabad mein mojood deegar aqwam ko islam ka manfi pegham pohanch raha hai jaisa ke aksar yeh dekhnay mein aaya hai ke jaagne ki raat ke liye shehar ke ahem maqamat, sadkon aur hotels mein police ka ziyada bandobast kiya jata hai aur jo police ohdedaron ko duty par tainaat kiya jata hai woh yeh shikayat karte hue dekhe jatay hain ke bhai musalmanoun ki jaagne ki raat hai is liye hamein ziyada duty karni pad rahi hai aur intizamaa mein kisi qisam ki chowk honay par jawabdah bhi hona padta hai jis ki wajah se hum par ziyada dabao rehta hai .
Police ohdedaron ka yeh bayan ba-hasiat musalman hamaray liye afsos ka maqam hai kyunkay Huzoor-e-Akram ﷺ neh jis par aman mazhab ki taleem di hai isi mazhab ke naam par hum apne manfi amal ke zariye logon ko na sirf takleef dainay ka baais ban rahay hain balkay aghyaar ko islam se door karne ki wajah hum khud he ban rahay hain halaanke hum par dosaron tak islam ki talemaat pohanchanay ki buniyadi zimme daari aed hai. noujawanon ke manfi harkaat ke zimn mein aksar yeh kaha jata hai ke qoum ko sudharnay ki zimma daari ulama par aed hoti hai lekin sawal yeh paeda hota hai ke shab-e-baraat ke mauqa par taqreeban har masjid mein ulmaye karaam ka imaan Afroz bayan hota hai lekin jab yeh nojawan masjid ki bajaye Necklace Road par shaitani harkato mein masroof hotay hain to phir unki tarbiyat ka samaan kaisay ho? ulmaye karaam se ziyada is waqt walidain par zimma daari aed hoti hai ke woh inhen jaagne ki raat ke asal maqasid se waaqif karwaen. ulmaye karaam aur zimma daraan is janib musalsal tavajja mabzol karwa rahay hain ke jaagne ki raat ka bahana bana kar Necklace Road par shaytani harkaat aur bike riding se ijtinab karen kyunkay yeh akhirat ko barbaad karne ka kaam honay ke sath hi duniyawi aitbaar se bhi is mein khatrah hai kyunkay bike riding se haadsat ke khadshaat badh jatay hain aur kon walidain chahainge ke shab-e-baraat ke mauqa par khuda na khwasta hazaar martaba khuda na khwasta unke jawan betay ki laash ghar ko aeye .
Jaagne ki raat ka maqsad masjid ya ghar ke kisi koone mein aur khaas kar tanhai mein Allah rab ulizzat ki bargaah mein apne gunaaho ki maffi aur is ki rehmat wo fazl wo karam ka taalib hona hai. Ulama-e-karaam ne nihayat hi mukhlis andaaz mein appeal ki hai ke agar masajid aur gharon mein tanhai mein ibadat karna mushkil ho raha hai to behtar hai ke Isha ki namaz bajmaat ada karte hue hasb-e-istetat kuch nawafil, tilawat quran-e-Majeed aur duaon ka ihtimaam karne ke baad so jana behtar hai aur Fajar ki namaz bajmaat ada karna bhi jaagne ki fazeelat se istifada karne ke mutradif hai. is ke baraks jaagne ke naam par Necklace road, tank band aur shehar ke mashhoor hotels mein waqt guzari se ahtiyat kiya jana zurori hai .
Tehreer ka yeh to pehla hissa ho chuka hai ke jaagne ke naam par raat bhar kin kamon se ijtinab kiya jaye ab tehreer ka dosra hissa woh hai jis mein ulmaye karaam neh bataya hai raat ko jagtay hue kis tarha apni duniya aur akhirat ki kamyabi haasil ki ja sakti hai. is raat mein Allah taala bandon ke gunah bakhsnay ka intizam karta hai lekin is raat mein bhi kuch aisay bad naseeb log hotay hain jinhein Allah taala apni rehmat, fazl wo karam se mahroom rakhta hai. Ulama-e-karaam neh ahadees ki roshni mein jo khulasa paish kiya hai is ke tehat hi andaza ho jata hai ke aaj ki is raat mein mandarja zail afraad ki maafi nahi hoti basharte kay woh apne un gunaaho se mafi talab karlen kyunkay Allah ki rehmat ka ek pehlu yeh bhi hai ke woh har baday gunah ko maaf karta hai basharte kay sachey dil se bandah mafi talab kare aur aindah zindagi mein is gunah se bachney ka musammam iradah kar le .
Jin badnaseeb afraad ko Allah taala aaj ki raat bhi maaf nahi karta woh yeh afraad hain. ahadees mein is raat mein jo khusoosi maamla rehmat wo mafi ka hota hai is ko zikar kiya gaya isi tarha yeh bhi batadiya gaya hai ke is azeem raat mein Allah taala ki rehmat se kon kon log apne gunaaho aur nafarmaniyou ki wajah se mahroom rahen ge. is mauqa par hum ek nazar un gunaaho par daaltay hain jo is azeem raat mein bhi mehroomi ka sabab bantay hain. mukhtalif ahadees mein zikar kiye gaye gunaaho ko ekja karen to darj-e-zail gunah hain jin ke murtakib afraad maghfirat aur maafi se mahroom rehtay hain. ( 1 ) Shirk karne walay. ( 2 ) Keena rakhnay wala. ( 3 ) Kisi insaan ka na-haq qatal karne wala. ( 4 ) Badkaar aurat. ( 5 ) Qata Rehmi karne wala. ( 6 ) Tohband, ya pajama, taqnoun se neechay latkanay wala. ( 7 ) Walidain ka nafarman. ( 8 ) Sharaab noshi ki aadat rakhnay wala. un tamam gunaaho ki jo muzammat quran wo hadees mein bayan ki gayi .
Aaj ki raat sab se pehlay hamein yeh dekhanaa hoga ke kahin hum mandarja baala kisi zamray mein shaamil to nahi jis par Allah ne maafi na dainay ka faisla kiya hai aur agar hum is zamray mein shaamil hain to aaj ki raat sachey dil se aur mussamam iraday ke sath tauba karli jaye to Allah ki rehmat se umeed hai ke woh hamein apne nafarman bandon ki jamaat se nikaal kar un logon mein shaamil zaroor karlay ga jin par is neh inaam kiya hai . –YTN STAFF